தேசிய அளவில் பாரதியார் பல்கலை.,க்கு 13-வது இடம்

கோவை : தேசிய அளவில் அனைத்துப் பல்கலைக்கழகங்களுக்கான தரவரிசைப்பட்டியலில் கோவை பாரதியார் பல்கலைக்கழகம் 13-வது இடத்தைப் பிடித்துள்ளது. 

மத்திய மனித மேம்பாட்டுத் துறையின் சார்பாக ஆண்டுதோறும் கல்வி நிறுவனங்களுக்கான தரவரிசைப் பட்டியலை வெளியிட்டு வருகின்றது. அவ்வாறு, இந்தாண்டிற்கான தரவரிசைப் பட்டியலானது இன்று அறிவிக்கப்பட்டுள்ளது. அதில், இந்திய அனைத்துக் கல்வி நிறுவனங்கள் அளவில் கோவை பாரதியார் பல்கலைக்கழகம் 20-வது இடத்தைப் பெற்றுள்ளது. இதேபோல, அனைத்துப் பல்கலைக்கழகங்களுக்கான தரவரிசைப் பட்டியலில் பாரதியார் பல்கலைக்கழகமானது 13-வது இடத்தைப் பெற்றுள்ளது. மேலும், தமிழக கலை மற்றும் அறிவியல் பல்கலைக்கழகங்களில் முதல் பல்கலைக்கழகமாக விளங்குகிறது.

மேலும், கற்பித்தல் மற்றும் கற்றலுக்கு 65.54 சதவிகித மதிப்பெண்களும், ஆராய்ச்சி மற்றும் தொழில்முறைப் பயிற்சிக்கு 41.70 சதவீத மதிப்பெண்களையும் கோவை பாரதியார் பல்கலைக்கழகம் பெற்றுள்ளது.