கோவையில் காதலித்து ஏமாற்றிய இளைஞர் மீது இளம்பெண் மாவட்ட ஆட்சியரிடம் புகார்

கோவை: கோவை செல்வபுரத்தைச் சேர்ந்த 23 வயது இளம்பெண் சினேகா, அதே பகுதியைச் சேர்ந்த விக்னேஷ் என்பவரை கடந்த 6 ஆண்டுகளாக காதலித்து வந்துள்ளார். விக்னேஷ் திருமணம் செய்து கொள்வதாக ஆசை வார்த்தை கூறி பலமுறை சினேகாவுடன் தனிமையில் இருந்துள்ளார். ஆனால் பின்னர் திருமணம் செய்து கொள்ளாமல் ஏமாற்றியுள்ளார்.

இது தொடர்பாக சினேகா போத்தனூர் மகளிர் காவல் நிலையத்திலும், கோவை மாநகர காவல் ஆணையர் அலுவலகத்திலும் புகார் அளித்தும் எந்த நடவடிக்கையும் எடுக்கப்படவில்லை என்பதால், ஜூலை 16 அன்று மாவட்ட ஆட்சியரிடம் மனு அளித்துள்ளார்.

சினேகா கூறுகையில், புகார் அளித்தால் தன்னையும் தனது குடும்பத்தையும் கொலை செய்து விடுவதாக விக்னேஷ் மிரட்டி வருவதாகவும், விக்னேஷ் திமுகவைச் சேர்ந்தவர் என்பதால் காவல் நிலையத்தில் புகாரை ஏற்க மறுப்பதாகவும் தெரிவித்தார்.

மேலும், விக்னேஷுடன் நெருக்கமாக பழகியதில் தனக்கு குழந்தை உண்டாகி மூன்று மாதம் கர்ப்பிணியாக இருந்ததாகவும், அப்போது விக்னேஷின் பெற்றோர் கர்ப்பத்தை கலைத்து விட்டால் திருமணம் செய்து வைப்பதாக கூறியதாகவும் தெரிவித்தார். ஆனால் கர்ப்பத்தை கலைத்த பிறகு திருமணத்திற்கு மறுத்து விட்டனர் என்றும் கூறினார்.

விக்னேஷ் தற்போது வேறொரு பெண்ணை திருமணம் செய்து கொண்டதாகவும், தன்னை தொடர்ந்து உடலுறவுக்கு அழைத்து மிரட்டுவதாகவும் சினேகா குற்றம்சாட்டினார். மேலும், தாங்கள் காதலித்த போது எடுத்த புகைப்படங்கள் மற்றும் தனிமையில் இருந்த போது எடுத்த வீடியோக்களை சமூக வலைதளங்களில் பதிவிடுவதாக மிரட்டுவதாகவும் தெரிவித்தார்.

தன்னை ஏமாற்றியதோடு மட்டுமல்லாமல் தனது குடும்பத்திற்கும் கொலை மிரட்டல் விடுத்த விக்னேஷ் மீது தகுந்த நடவடிக்கை எடுக்க வேண்டும் என்று சினேகா கேட்டுக்கொண்டார்.